Fintech Supervisory Sandbox (Chinese Version Only)

唔係玩泥沙嘅金融科技沙盒

小森:
上星期財政預算案裡面財爺提到好多金管局金融科技(Fintech)嘅發展呀!

阿四:
講開Fintech,聽聞金管局有個乜嘢沙盒?

小森:
「金融科技監管沙盒」呀!去年9月推出,截至今年2月底就有6間銀行嘅12項金融科技項目用沙盒進行測試。

阿四:
點解叫做沙盒?

小森:
沙盒英文係Sandbox,意思係畀小朋友玩泥沙嘅地方。金融科技監管沙盒就係畀銀行推出方便用戶嘅金融科技產品前,先喺小範圍做測試,試啱先正式推出市面。

阿四:
究竟係銀行要搬個沙盒返去用,抑或要嚟金管局用沙盒呢?

小森:
沙盒唔係真係一個盒,亦無泥沙玩!而係一種監管理念,容許銀行唔需要完全符合監管要求,就可以測試新產品。舉個例子,舊年有間銀行計劃推出指紋認證技術,用嚟登入手機銀行,佢哋用咗沙盒,先畀過百個員工真實試用一段日子,收集用戶意見,無問題先正式推出畀客戶。

阿四:
咁有乜好處呢?

小森:
你都知新科技嘅嘢,真係要多啲人試用先知有冇問題。沙盒嘅目的就係向銀行提供一個風險可控嘅範圍,等佢哋唔需要符合所有監管規定情況下,試下產品嘅運作,咁樣可以加快推出產品嘅時間。以生物認證為例,銀行認為可以縮短2至3個月時間㗎。

阿四:
頭先你話有12項金融科技項目有用沙盒測試,包括咗啲乜呢?

小森:
有「生物認證技術」,包括有聲音、指紋同手指靜脈嘅認證,部分已經推出市場,唔使用戶登入名稱、唔使密碼、唔使簽名,就可以用到銀行服務。仲有區塊鏈(Blockchain)、應用程序接口(Application Programming Interfaces)、聊天機械人(Chatbot)、軟體認證令牌(Soft Tokens)。

阿四:
除咗生物認證外,其他我都唔係好明你講乜!

小森:
呢啲都係會重大改變金融業運作嘅技術!我下次有時間解你知。

阿四:
其實係咪任何初創企業都可以用金融科技沙盒㗎?

小森:
阿四,我考下你,金管局係監管啲乜?

阿四:
金管局監管香港嘅銀行業務同接受存款公司嘛!咁淺都要問,你唔好當我係Lulu。

小森:
無錯嘞。金管局負責監管銀行,所以佢哋嘅沙盒只係適用於銀行。不過有初創企業都夥拍銀行研發金融科技項目,仲一齊用沙盒㖭。

阿四:
希望銀行推出多啲新科技產品,等我哋啲市民都可以得益。
 
想問多啲有關金管局工作,歡迎電郵到小森、阿四專用郵箱:
[email protected]