脑力编程马拉松

脑力编程马拉松

小森:
啱啱个周末我去咗由一间本地银行举办嘅金融科技脑力编程马拉松(Hackathon)比赛,见识到本地同学喺金融科技方面原来都几有创意喎。

阿四:
脑力…马拉松?

小森:
Hackathon系科技界好流行嘅一种比赛,通常喺畀大学生组队参加。今次比赛系首个透过金管局及数码港嘅「脑力编程加速器」(Haccelerator)平台举办嘅活动,参赛者要喺24小时内度跷解决问题,仲要将意念化成产品嘅雏型做示范,过程好紧张。

阿四:
今次Hackathon出乜题目畀参赛者?

小森:
主题系如何应用机器学习(Machine Learning)技术于银行服务。比赛分两个题目,一个要用机器学习去分析客户行为,帮银行更有效去销售推广,又或者侦测帐户嘅可疑行为;另一个就系聊天机械人,用嚟同银行客户进行互动沟通。

阿四:
机器学习系乜东东嚟㗎?

小森:
你有冇听过AlphaGo最近击败中国世界围棋冠军柯洁嘅新闻吖?AlphaGo就系应用咗机器学习技术啦!简单讲,机器学习系人工智能嘅一种,模拟人类嘅学习行为,凭经验不断改善自身嘅性能。

阿四:
哗,听落好似好劲。有几多同学参加?佢哋嘅水准点呢?

小森:
总共有超过110位同学报名参加,分为14队比赛。金管局金融科技促进办公室(FFO)嘅同事有份担任今次比赛嘅判评,听佢讲同学水准都几高,参赛作品有创意得嚟,又唔会太离地。比赛最后有双冠军,其中一个作品系透过聊天机械人为客户提供个人财富管理服务,另一个作品则透过机器学习演算法分析客户数据,提供崭新购物体验。

阿四:
金管局好重视呢方面嘅人才培训,FFO仲会唔会举办更多呢类比赛?

小森:
FFO今年推出嘅Haccelerator就系希望透过举行比赛物色人才,今次Hackathon系头炮,好快就会公布加速器比赛(Accelerator)。

阿四:
你下次再话我知乜嘢系Accelerator啦!

想问多啲有关金管局工作,欢迎电邮到小森、阿四专用邮箱:
[email protected]