金融科技实习生返工啦!

金融科技实习生返工啦!

小森:
金管局同十二间银行合办嘅金融科技人才培育计划(FCAS),今年招聘嘅实习生噚日嚟咗金管局参加迎新活动!

阿四:
我知道计划好受欢迎,收到超过四百份嘅申请,最后有七十四位学生获聘。

小森:
我听负责嘅同事讲,呢个计划唔止吸引到修读商科、IT嘅同学,连修读法律、心理、物流、环境科学嘅学生都有申请。

阿四:
金融科技发展多元化,确实系需要有不同技能嘅人才。为咗得到呢个难得嘅实习机会,学生都表现得好积极。例如有去咗外国交流嘅香港学生,特登晨早五点起身同香港呢边进行视像面试。FCAS实习生返工后,将会有乜做?

小森:
佢哋将会各自喺受聘嘅十二间银行或者金管局,接受为期六个月或十二个月嘅在职培训,落手落脚参与金融科技嘅项目。佢哋噚日参加咗分别由金管局同香港应科院提供嘅专题课程,学习有关金融监管同金融科技嘅最新发展。

阿四:
我同咗几位同学倾偈,佢哋都话急不及待参与银行嘅金融科技项目,希望日后推出可以更多创新嘅产品,方便用。

小森:
同学都好有抱负,香港金融科技嘅发展就靠佢哋啦!
 

想问多啲有关金管局工作,欢迎电邮到小森、阿四专用邮箱:
[email protected]