智慧银行新纪元

智慧银行新纪元

阿四:
陈总,成日听到人话香港手机支付无内地咁普及,我哋喺金融科技方面要「追落后」!

陈德霖:
金融科技范畴咁广,手机支付只系其中之一,其他方面如网络安全都好紧要㗎。即使电子支付,香港发展成熟,港人平均每日碌信用卡170万次,日均金额有17亿,而八达通卡日均更「嘟」1400万次㗎!

阿四:
你刚公布金管局会推动香港迈向「智慧银行新纪元」,当中提到明年9月推出「快速支付系统」,市民只需要手机号码或电邮地址就可以全天候、跨行、即时转帐港元或人仔,真系前所未有咁方便。

陈德霖:
我哋亦积极同业界商讨制定一个共通嘅二维码(QR code),希望鼓励更多小商户使用流动支付。

阿四:
另外,好多人都关心金融科技沙盒升级到2.0。沙盒用嚟畀金融科技产品先喺小范围做测试,旧年9月推出以嚟,反应好好。

陈德霖:
无错,已经有9间银行嘅23个项目曾经或者正在使用沙盒,部分已经推出市场应用,例如指纹识别系统、聊天机械人,为银行用户带嚟新体验。

阿四:
沙盒升级后新加三大功能,其中一个系聊天室,点解有呢个意念?

陈德霖:
我哋相信,如果创新项目构思初期,银行同科技公司已经有特定渠道得到监管意见,就会行少啲冤枉路,有助鼓励金融科技业发展。

阿四:
仲有,沙盒之前只开放畀银行或者同银行合作嘅科技公司使用,升级后,科技公司就可以直接透过聊天室,同金管局沟通。

陈德霖:
沙盒2.0仲新增「一点通」切入,协助一啲跨界别嘅项目,按需要接通金管局、证监会同保监局嘅沙盒,唔使再逐间机构拍门。

阿四:
智慧银行新纪元举措之一,系引入虚拟银行。虽然内地同海外都有个别呢啲例子,香港行唔行得通㗎?

陈德霖:
金管局好快会谘询业界,睇下2000年发出嘅虚拟银行指引,有冇需要修订去配合今时今日虚拟银行嘅发展需要。根据海外经验,虚拟银行有助落实普及金融,亦好受个人同中小企业欢迎。

阿四:
哗,咁多嘢,搞唔搞得掂?

陈德霖:
只要我哋同银行同科技业界共同努力,冇话唔得嘅!

想问多啲有关金管局工作,欢迎电邮到小森、阿四专用邮箱:
[email protected]