跨境金融科技大踏步

跨境金融科技大踏步

阿四:
陈总,金管局呢排好「Fintech」喎。上个月你先宣布香港进入智慧银行新纪元,早两日又喺金融科技日话同新加坡、粤港澳大湾区加强跨境合作发展金融科技。

陈德霖:
智慧银行新纪元唔系讲咗算数,要用实际行动找数!跨境合作系提升香港金融科技嘅重要环节,唔能够掉以轻心。

阿四:
我知道,金管局伙拍7间银行推出贸易融资平台,迟啲仲会接通新加坡贸易平台,其实有乜用?

陈德霖:
贸易融资一直难以数码化,原因系每宗贸易嘅参与者通常来自唔同地区、往来文件繁琐。而且融资过程大多数系人手处理,有造假风险,所以银行审批贸易融资都特别审慎。金融科技就带嚟重大突破,香港嘅贸易融资平台会采用分布式分类帐技术(distributed ledger technology,DLT),将贸易融资流程自动化同数码化,减省用纸。DLT同时有不容许改动文件内容嘅特点,所以能够降低诈骗风险。日后我哋同新加坡嘅贸易平台接通咗,有助促进跨境贸易同资金融通。

阿四:
呢个跨境平台咁帮得手,银行以后就可以放心做多贸易融资。但有一点我唔明:香港同新加坡唔系竞争关系咩?

陈德霖:
阿四,要维持国际金融中心地位要望远啲,呢个跨境贸易融资平台可能系全世界第一个应用DLT解决跨境融资数码化同自动化问题嘅方案,同新加坡合作成功后,可以扩展同其他贸易伙伴合作。呢个系一项重要金融基建设施,对香港将来嘅贸易融资发展有战略性意义。

阿四:
咁粤港澳大湾区又有咩重点项目?

陈德霖:
大湾区喺金融同科技方面有好大「强强联合」嘅空间,肯定系中国发展现代金融服务业同Fintech嘅桥头堡。金管局将会同深圳当局推出多项合作项目,例如金融科技创新大赛、互相转介金融科技公司落户,仲筹备紧香港大学生明年去深圳龙头科技公司做暑期实习。

阿四:
哗,咁多工作同时进行,睇嚟香港呢个新纪元好快就到!

想问多啲有关金管局工作,欢迎电邮到小森、阿四专用邮箱:
[email protected]