「币」家伙!

「币」家伙!

阿四:
近排同老友聚会,一个话买咗「乜乜币」,另一个就话投资「ICO」。我都跟风试下投资,但唔知点解用信用卡畀钱时,过唔到数嘅。

小森:
话就话系「币」,其实系一种虚拟商品嚟㗎。因为呢啲虚拟商品一般有不具名嘅特性,国际社会愈来愈关注佢哋可能会成为洗黑钱、恐怖分子融资等嘅中介工具,有啲银行更加已经禁止客户用信用卡买呢啲商品,一啲常用嘅社交平台都开始禁止呢类商品广告。而国际货币基金组织IMF总裁拉加德日前就公开呼吁全球联手监管呢啲虚拟商品。其实你头先讲个啲「乜乜币」,我都睇唔透究竟投资咗啲乜,不沾手为妙。

阿四:
但我听到人哋话呢啲「乜币」「物币」发行量好少,供不应求,好有升值潜力。

小森:
就算一啲虚拟商品嘅发行量可能设有上限,但近年嚟不断有新嘅虚拟商品推出,全世界已有过千类呢啲商品喎,价格又极度波动,投机意味好重。如果价格大幅下跌,你系咪承受到损失先?

阿四:
投资得高科技,当然有心理准备!一见势色唔对,我咪即刻沽货离场罗。

小森:
我怕你沽唔到咋!呢类商品价格上落都好大,一日内跌一、两成系家常便饭,其中一只币就曾经试过十二个小时内跌咗七成!况且呢啲「乜币」「物币」唔系法定货币,无实物支持,而交易亦唔受任何监管,万一发行商或者虚拟商品交易所倒闭嘅话,投资就化为乌有。仲有呀,最近接二连三有虚拟商品交易所被黑客入侵,偷走投资者嘅「代币」,追都追唔返。不如咁啦,我送个我发行嘅「小森币」畀你,等你记住小心为上!

阿四:
真系多谢晒!

想问多啲有关金管局工作,欢迎电邮到小森、阿四专用邮箱:
[email protected]