开放API-续篇

开放API-续篇

阿四:
小森,半年前你喺呢度话我知,开放API(Application Programming Interface,应用程式介面)系一间机构对外开放自己系统嘅资料或功能,畀其他服务供应商或程式使用。估唔到金管局咁快都开放自己嘅API!

小森:
系呀,下星期一(7月23日)开始,金管局网站率先推出最常用嘅50组金融数据同重要资讯嘅开放API,明年年中前增至130组。应用程式开发商可以发挥创意,将呢啲资料应用喺生活场景,例如将收银车日程表加埋卫星导航,喺手机教人点去搵收银车;又或者利用金管局公布嘅欺诈银行网站名单,喺手机同电脑自动阻隔呢啲网站等。

阿四:
又例如金融数据,其实金管局网站一直有公开呢啲数据,开放API后,只要透过简单嘅应用程式,预先设定想要嘅数据同范围,就可以即时下载,数据定期自动更新,悭返好多时间!

小森:
另外,金管局亦公布咗银行业开放API框架,会分四个阶段落实。第一阶段系银行要喺未来6个月内开放产品资料嘅API;第二阶段系未来12至15个月内开放产品申请嘅API。至于第三同第四阶段分别系开放帐户资料同财务交易,时间会因应框架落实情况再订。

阿四:
好期待银行同第三方服务供应商喺开放API后推出更多崭新服务同产品,方便市民!

想问多啲有关金管局工作,欢迎电邮到小森、阿四专用邮箱:
[email protected]