我要做Fintech!

我要做Fintech!

阿四:
第二屆金融科技人才培育計劃(FCAS)將會喺2月開始接受報名,舊年參加FCAS嘅部分同學已經完成6個月實習嘞喎,佢哋做成點呀?

小森:
我同幾位FCAS實習同學傾過,佢哋都話工作好充實。好似Andy同Catherine,佢哋喺銀行負責數據分析嘅相關工作,實習期間要揼code畀銀行內部使用。而喺金管局金融科技促進辦公室實習嘅Effy,有份參與籌備貿易融資平台,除咗學識大熱嘅區塊鏈技術,仲會同嚟自各業界嘅持份者溝通㖭。

阿四:
呢啲金融科技(Fintech)實戰經驗千金難買,再加埋學校上堂教嘅理論,學習得更全面。工作之外,佢哋仲有冇其他得着?

小森:
Andy好高興識咗班友善嘅資深同事,實習完仲保持聯絡;Catherine就因為多同startup公司接觸,了解多咗行情,有助日後加入初創行列。Effy就從實習工作第一手接觸到金融業監管嘅發展。

阿四:
佢哋實習完之後,有乜打算?

小森:
三位年輕人嘅志向都好遠大:Catherine認為網絡保安大有可為,諗緊創業開startup;Effy就希望增加Fintech喺監管方面嘅知識,為香港金融普及作出貢獻;而Andy會向世界出發,喺全球急需金融科技人才嘅巨輪中,尋找發展機會。

阿四:
精神可嘉!佢哋有乜面試貼士畀想去銀行實習嘅師弟師妹?

小森:
綜合嚟講,佢哋認為僱主都幾重視面試者對金融科技有冇熱誠,而對金融科技ABCD有認識,一定有分加。

阿四:
金融科技ABCD?

小森:
AI(人工智能)、Blockchain(區塊鏈)、Cloud Computing(雲端運算)/ Cybersecurity(網絡保安)、Big Data(大數據)呀!佢哋話唔少名牌大學將呢啲課程免費放上網,有志加入 FCAS呢個大家庭嘅同學可以先上網學習,打好根底先去面試。

想問多啲有關金管局工作,歡迎電郵到小森、阿四專用郵箱:
[email protected]