「幣」傢伙!

「幣」傢伙!

阿四:
近排同老友聚會,一個話買咗「乜乜幣」,另一個就話投資「ICO」。我都跟風試下投資,但唔知點解用信用卡畀錢時,過唔到數嘅。

小森:
話就話係「幣」,其實係一種虛擬商品嚟㗎。因為呢啲虛擬商品一般有不具名嘅特性,國際社會愈來愈關注佢哋可能會成為洗黑錢、恐怖分子融資等嘅中介工具,有啲銀行更加已經禁止客戶用信用卡買呢啲商品,一啲常用嘅社交平台都開始禁止呢類商品廣告。而國際貨幣基金組織IMF總裁拉加德日前就公開呼籲全球聯手監管呢啲虛擬商品。其實你頭先講個啲「乜乜幣」,我都睇唔透究竟投資咗啲乜,不沾手為妙。

阿四:
但我聽到人哋話呢啲「乜幣」「物幣」發行量好少,供不應求,好有升值潛力。

小森:
就算一啲虛擬商品嘅發行量可能設有上限,但近年嚟不斷有新嘅虛擬商品推出,全世界已有過千類呢啲商品喎,價格又極度波動,投機意味好重。如果價格大幅下跌,你係咪承受到損失先?

阿四:
投資得高科技,當然有心理準備!一見勢色唔對,我咪即刻沽貨離場囉。

小森:
我怕你沽唔到咋!呢類商品價格上落都好大,一日內跌一、兩成係家常便飯,其中一隻幣就曾經試過十二個小時內跌咗七成!況且呢啲「乜幣」「物幣」唔係法定貨幣,無實物支持,而交易亦唔受任何監管,萬一發行商或者虛擬商品交易所倒閉嘅話,投資就化為烏有。仲有呀,最近接二連三有虛擬商品交易所被黑客入侵,偷走投資者嘅「代幣」,追都追唔返。不如咁啦,我送個我發行嘅「小森幣」畀你,等你記住小心為上!

阿四:
真係多謝晒!

想問多啲有關金管局工作,歡迎電郵到小森、阿四專用郵箱:
[email protected]