開放API-續篇

開放API-續篇

阿四:
小森,半年前你喺呢度話我知,開放API(Application Programming Interface,應用程式介面)係一間機構對外開放自己系統嘅資料或功能,畀其他服務供應商或程式使用。估唔到金管局咁快都開放自己嘅API!

小森:
係呀,下星期一(7月23日)開始,金管局網站率先推出最常用嘅50組金融數據同重要資訊嘅開放API,明年年中前增至130組。應用程式開發商可以發揮創意,將呢啲資料應用喺生活場景,例如將收銀車日程表加埋衛星導航,喺手機教人點去搵收銀車;又或者利用金管局公布嘅欺詐銀行網站名單,喺手機同電腦自動阻隔呢啲網站等。

阿四:
又例如金融數據,其實金管局網站一直有公開呢啲數據,開放API後,只要透過簡單嘅應用程式,預先設定想要嘅數據同範圍,就可以即時下載,數據定期自動更新,慳返好多時間!

小森:
另外,金管局亦公布咗銀行業開放API框架,會分四個階段落實。第一階段係銀行要喺未來6個月內開放產品資料嘅API;第二階段係未來12至15個月內開放產品申請嘅API。至於第三同第四階段分別係開放帳戶資料同財務交易,時間會因應框架落實情況再訂。

阿四:
好期待銀行同第三方服務供應商喺開放API後推出更多嶄新服務同產品,方便市民!

想問多啲有關金管局工作,歡迎電郵到小森、阿四專用郵箱:
[email protected]