你「轉數快」咗未?

你「轉數快」咗未?

小森:
上星期我哋提過嘅快速支付系統,終於宣布推出啦,仲改咗名叫「轉數快」。以後市民可以用收款人嘅手機號碼或電郵地址,即時畀錢人!

阿四:
我可以喺邊度下載呢個app?

小森:
無app㗎!「轉數快」係金管局提供畀銀行同手機錢包營運商嘅轉帳平台,呢31家機構嘅用戶以後經「轉數快」收錢,只要喺網上銀行、手機銀行或電子錢包登記,將手機號碼綁定收款帳戶,就係咁簡單。

阿四:
但係我有幾個戶口同手機錢包,手機號碼只得一個,我點知啲錢會轉去邊個戶口㗎?

小森:
一個手機號碼可以登記多個戶口同電子錢包,但你要揀其中一個做預設收款帳戶。當有人轉錢畀你,只需輸入你嘅手機號碼,啲錢就即時轉入你嘅預設收款帳戶。

阿四:
假如我同朋友食完飯夾錢,想用預設收款帳戶以外嘅其他已登記帳戶收錢,點做呀?

小森:
你叫朋友輸入你嘅手機號碼後,再輸入埋你銀行或電子錢包名稱,咁就搞掂。

阿四:
用「轉數快」收錢要登記,咁畀錢又使唔使登記?

小森:
唔使。你用返平日用開嘅網上銀行、手機銀行或手機錢包轉帳就得。「轉數快」啟用後,你轉帳時可以選擇輸入收款人嘅手機號碼,再輸入轉帳銀碼,核對返資料正確,咁就轉到數。

阿四:
「轉數快」喺9月30日開始正式啟用,想享受年中無休、無銀行/手機錢包限制、小額過數無收費嘅即時個人對個人(P2P)轉帳服務,就快啲登記!

轉數快網頁:https://fps.hkicl.com.hk/chi/fps/index.php

想問多啲有關金管局工作,歡迎電郵到小森、阿四專用郵箱:
[email protected]