「六神合體」嘅共用二維碼

「六神合體」嘅共用二維碼

阿四:
小森,聽講金管局推出咗全球首創「共用二維碼」 流動應用程式(「HKQR」app)用嚟收款,好威水喎!市民可以點用?

小森:
主要係畀商戶收錢用嘅。你買嘢畀錢時,有冇發現一啲收銀處放咗好多個二維碼?咁係因為支付營運商都各有專用嘅二維碼。金管局推出「共用二維碼」就可以將一大堆二維碼「六神合體」,商戶以後只需要一個二維碼,就收到來自唔同銀行、電子錢包嘅款項。

阿四:
商戶點樣申請用「共用二維碼」?

小森:
唔使申請,商戶只需要喺Google Play Store及Apple App Store下載「HKQR」流動應用程式,再按照指示,將多個二維碼整合成一個二維碼,就可以用得!而且費用全免。但注意返,而家商戶用嚟收款嘅二維碼,大部分都未符合「香港共用二維碼標準」,如果商戶用唔到HKQR「合體」,就要聯絡返相關儲值支付工具營運商啦!

阿四:
用二維碼收錢係方便嘅,但睇新聞見到,有不法之徒會將商戶嘅二維碼偷龍轉鳯,換做自己嘅二維碼去偷錢!

小森:
二維碼係收錢工具,所以商戶有責任小心看管,例如收鋪時收埋個二維碼,否則就等如將舖頭鎖匙周圍放無分別。想知多啲點用二維碼收款,可以瀏覽呢個網頁https://fps.hkicl.com.hk/chi/fps/merchants/qr_code.php


想問多啲有關金管局工作,歡迎電郵到小森、阿四專用郵箱:
[email protected]