區塊鏈‧「貿易聯動」

區塊鏈‧「貿易聯動」

阿四:
小森,我知道香港銀行界喺區塊鏈(blockchain)應用有新突破喎!

小森:
你講緊嘅係由金管局同銀行業界攜手推出嘅「貿易聯動」(eTradeConnect)。呢個係香港銀行業第一個大型應用區塊鏈技術嘅貿易融資資訊互享平台,解決傳統貿易融資嘅弊病,現階段已經有十二間主要銀行參與㗎!

阿四:
「貿易聯動」同傳統貿易融資有乜分別?

小森:
咁要先講傳統貿易融資嘅三個痛點。第一,貸款仍然依賴大量紙張嘅證明文件,人手核實同處理文件極之費時;第二,紙本文件容易出現文書錯誤;第三,貸款資訊唔透明,不時有騙徒利用一張發票同時向多間銀行貸款進行欺詐。針對呢啲痛點,「貿易聯動」唔單止協助銀行將所有文件數碼化,仲會將貸款嘅採購訂單同發票自動對帳,節省咗紙張同減低人為出錯機會。而且,有別於傳統記帳需要有中央數據庫,參與銀行會各自有一本「帳簿」,每當有銀行更新貿易融資資料(僅限事前已獲客戶同意嘅資料)時,就會即時同步複製同儲存所有參與銀行嘅「帳簿」,並會經加密處理,資料一經記錄就唔可以更改,騙徒以後好難再用一張發票騙天下。

阿四:
「貿易聯動」提高咗信貸資料透明度,降低詐騙風險,銀行向中小企借出貿易貸款嘅機會自然會大啲!

小森:
貿易融資多涉及跨境業務,所以「貿易聯動」日前就同咗歐洲最大嘅數碼貿易融資平台we.trade簽署諒解備忘錄,並即時展開概念原型建設,為呢兩個區塊鏈平台日後互聯互通做好準備。呢類平台算係新事物,we.trade都係今年6月先推出㗎咋,我都好期待,平台日後連接其他地區,加大覆蓋。

想問多啲有關金管局工作,歡迎電郵到小森、阿四專用郵箱:
[email protected]