区块链与打麻将

区块链与打麻将

阿四:
陈总喺早几日最佳金融科技奖颁奖礼透露金管局开始研究数码货币,又话数码货币系用分布式分类帐技术(Distributed Ledger Technology,DLT),究竟系乜嚟?

小森:
DLT系一种记帐技术,当中又以Blockchain区块链最多人留意,特点系将数据复制畀各参与者,并合组成为细块,经各方验证用家身份同数据真实无误后,再以加密链将细块串连,锁死数据唔能够更改,最后储存喺各方嘅数据库入面。一般来说,就算数据出错都唔可以删走,只能加入新数据修补。任何纪录一经区块链技术留低,就永远留底。

阿四:
刚才你讲每个字我都识,但串埋一齐就唔明。

小森:
试下用个比喻。话说有日你同三个朋友打麻将,想搵人帮手记数,但又信唔过其他人。于是你哋各自一本电子数簿,每打完一铺牌,赢嗰个就记数,资料会自动复制到其他人嘅数簿。打完几圈,数簿记满一页之后,大家各自攞出嚟对数,核实咗呢页嘅纪录无问题后,电子数簿会自动将各人目前总输赢嘅银码记喺下一页页顶,再由呢页开始记录下一圈之后嘅数,如此类推。

阿四:
当打完牌计数时发现有本簿唔啱数,即系有人做咗手脚啦?

小森:
呢种方法做手脚唔容易,如果有人偷偷改动其中一本数簿嘅一个数字,全页嘅纪录就对唔到下一页页顶嘅总输赢银码。

阿四:
有无可能改晒四本簿?

小森:
除非有齐四个人同意先改到。打麻将只系比喻,喺真实应用时,区块链嘅「数簿」可以多达几十又或上百本,储喺唔同地方、由唔同人保存,要全部窜改都几难。

阿四:
区块链可以点应用喺金融业?

小森:
有银行已经使用区块链技术去改善按揭嘅流程,由估值公司直接将估值资料输入喺一本同银行共用嘅簿。呢种做法可以确保估值资料喺传输过程中无被窜改,同埋减少人手出错嘅机会。另外亦有银行研究紧利用区块链解决贸易融资上嘅问题。

阿四:
原来区块链可以咁应用!香港喺金融科技方面,其实都应用得好快喎。

想问多啲有关金管局工作,欢迎电邮到小森、阿四专用邮箱:
[email protected]