我要做Fintech!

我要做Fintech!

阿四:
第二届金融科技人才培育计划(FCAS)将会喺2月开始接受报名,旧年参加FCAS嘅部分同学已经完成6个月实习嘞喎,佢哋做成点呀?

小森:
我同几位FCAS实习同学倾过,佢哋都话工作好充实。好似Alan同Catherine,佢哋喺银行负责数据分析嘅相关工作,实习期间要揼code畀银行内部使用。而喺金管局金融科技促进办公室实习嘅Effy,有份参与筹备贸易融资平台,除咗学识大热嘅区块链技术,仲会同嚟自各业界嘅持份者沟通㖭。

阿四:
呢啲金融科技(Fintech)实战经验千金难买,再加埋学校上堂教嘅理论,学习得更全面。工作之外,佢哋仲有冇其他得着?

小森:
Alan好高兴识咗班友善嘅资深同事,实习完仲保持联络;Catherine就因为多同startup公司接触,了解多咗行情,有助日后加入初创行列。Effy就从实习工作第一手接触到金融业监管嘅发展。

阿四:
佢哋实习完之后,有乜打算?

小森:
三位年轻人嘅志向都好远大:Catherine认为网络保安大有可为,谂紧创业开startup;Effy就希望增加Fintech喺监管方面嘅知识,为香港金融普及作出贡献;而Alan会向世界出发,喺全球急需金融科技人才嘅巨轮中,寻找发展机会。

阿四:
精神可嘉!佢哋有乜面试贴士畀想去银行实习嘅师弟师妹?

小森:
综合嚟讲,佢哋认为雇主都几重视面试者对金融科技有冇热诚,而对金融科技ABCD有认识,一定有分加。

阿四:
金融科技ABCD?

小森:
AI(人工智能)、Blockchain(区块链)、Cloud Computing(云端运算)/ Cybersecurity(网络保安)、Big Data(大数据)呀!佢哋话唔少名牌大学将呢啲课程免费放上网,有志加入 FCAS呢个大家庭嘅同学可以先上网学习,打好根底先去面试。

想问多啲有关金管局工作,欢迎电邮到小森、阿四专用邮箱:
[email protected]