潮搭的士

潮搭的士

阿四:
前几日我搭的士,遇到一部可以选择用电子钱包支付车费嘅的士。司机大佬收得好爽手,确系几方便。

小森:
自从金管局2016年发出储值支付工具牌照以嚟,香港嘅电子钱包迅速发展,应用范围愈来愈阔。而家香港大约有几千部的士接受电子支付方式,等乘客有更多选择。

阿四:
唔止搭的士有得拣,部分街市亦已经引入咗电子支付,买鱼买菜买肉都可以拣用电子钱包畀钱,唔使再收到「湿立立」嘅散纸同散银喇。无论系商户定系顾客,大家都方便咗。

小森:
系呀!仲有,而家去寺庙都仲可以用手机「嘟」一下添香油钱㖭!

阿四:
话就话电子钱包用途多咗,事实上系咪多咗人用㗎?

小森:
睇数据就最客观。2017年第四季(即10月至12月)储值支付工具总交易量比2016年同期有明显的增长。值得留意嘅系,当中个人对个人转帐(P2P)增加咗9倍咁多,去到254万宗,而2017年第四季P2P交易金额大约14.3亿元,按年上升大约1.7倍!呢组数字反映市民对用电子钱包愈来愈受落。

阿四:
等到今年稍后时间,快速支付系统都推出嘅话,到时P2P可以做到跨行即时转帐,咁就更加方便啦!

想问多啲有关金管局工作,欢迎电邮到小森、阿四专用邮箱:
[email protected]